Al Pacino, një nga ikonat më të mëdha të Hollywood-it, është rikthyer në botën e krimit dhe mafies me filmin e ri aksion-triller “Father Joe”, duke sjellë një jehonë të qartë të rolit të tij legjendar si Michael Corleone në trilogjinë e pavdekshme “The Godfather”.
Aktori amerikan, 85 vjeç, u pa për herë të parë në setin e xhirimeve në Paris, të martën, ku u shfaq i transformuar plotësisht në personazhin e tij – një bos i fuqishëm mafioz, i veshur me një kostum bezhë elegant dhe një jakë të madhe gëzofi artificial që i jepte një prani të fortë e dramatike.
Filmi drejtohet nga Barthélémy Grossmann, ndërsa në rolin kryesor shfaqet Kiefer Sutherland, i cili luan Father Joe, një burrë me besim të thellë fetar që përballet me botën e krimit në Manhattanin e viteve ’90.
Në këtë rrëfim të errët e të tensionuar, personazhi i Pacino-s pritet të jetë një figurë kyçe në konfliktin moral dhe fizik që përshkon historinë.
“Father Joe” premton të jetë një përzierje e fortë mes aksionit klasik, dramës psikologjike dhe tensionit moral, ndërsa publiku pret me kureshtje të shohë Al Pacino-n në një tjetër rol të ngarkuar me energjinë dhe intensitetin që e kanë bërë të pavdekshëm në historinë e kinemasë.
