ot është ditëlindja e 76-të e Muharrem Hoxhës, aktorit të famshëm të humorit. Muharrem Hoxha u lind më 5 nëntor 1950 në Durrës. Në vitin 1969 ka mbaruar gjimnazin “Gjergj Kastrioti”. Lirohet nga ushtria në vitin 1972 dhe filloi si amator ne pallatin Rinia deri në vitin 1989. Në 1989-ën ka filluar si profesionist në estradën e Durrësit për të vijuar deri në 2015-ën qe doli në pension.
Rrema ka marrë pjesë në të gjitha premierat e Estradës në vite, në Teatrin e Kukullave, po ashtu dhe në mbrëmjet e vitit të ri, si në programet për fëmijë dhe në ato për të rriturit.
Ka luajtur në disa filma e kinokomedi nën firmën e Arian Çuliqit: “Përrallë moderne” 2018, ”Para nga qielli” 2009, “Pavioni 0”, “Tirana, viti zero” 2001, “Borxhliu” 1998, “Dashuri me krisma” 1997 , “Gjithë fajet i ka paraja” 1996 , “Fundi i marrëzisë” 1995, “Pak fresk sonte” 1994, “Zëvendësi i grave” 1987. “Lundrimi i parë” 1984 dhe në disa pjesë teatrale si: “Dy vëllezër e gjysmë” 2005 e Mjeshtrit Gjergj Vlashi, “Të jesh nënë” 2006 “Boll, kështu nuk shtyhet më” 2009, Binjakët” 2016, të gjitha me regji nga Driada Dervishi.
Muharrem Hoxha, me rreth 80 role të spikatura në estradë, teatër, filma e komedi, të cilat kanë përcjellë plot humor, situata e mesazhe të rëndësishme për publikun, e ka renditur emrin e tij në pararojën e varietesë durrsake e shqiptare.
Gjatë jetës së tij artistike ka marrë një numër të madh çertifikatash, diplomash e mirënjohjesh duke kulmuar dhe me çmime si “Aktori më i mirë” në vitin 2007 në Festivalin e Teatrit në Dibër si dhe “Çmimin e Karrierës” në vitin 2017 në po të njejtin Festival.
Mban mbi supe tituj të shumtë e me rëndësi si; “Artist i Merituar”, “Naim Frashëri”, “Naim Frashëri i Argjendtë”, “Naim Frashëri i Artë”, “Njeriu i Shekullit”, “Krenaria e Qytetit të Durrësit” si dhe titullin e lartë “Mjeshtër i Madh”. Aktualisht, është nga protagonistët më popullor të humorit e të satirës në vend.
Shëndet e jetë të gjatë RREMA 🙏
