Mina Koxhaku (1950-2013). Lindi në Berat me 1 janar. Pas mbarimit të Institutit të Larte të Arteve, më 1973, filloi punë në teatrin “Bylis” të Fierit, deri në vitin 2000, kur doli si aktor i lirë.
Ka luajtur shumë role në këtë teatër dhe është dalluar për krijimin e karaktereve origjinale: figura të rinjsh gazmorë, njerëz me sjellje të shpenguara, të moshuara, fshatarë të urtë e ironikë, si në shfaqjet: “Kështu të dua”, “Shoku Niqifor”, “Stinë e mërzitshme në Olimp”, “Gomone” etj.
Një nga figurat mbresëlënëse të tij ishte ajo e mullixhiut plak në dramën “Gjëmimi i atij dimri” e Teodor Laços, ku u ndërthurën gjakimi për të vizatuar një karakter të mëvetësishëm, me përjetimin dramatik të çasteve të vështira, deri heroike, përballë vdekjes.
Në aktrimin e tij përgjithësisht spikatin veprimet e shpenguara dhe tonet humoristike, të përthyera nën një përshtatshmëri aktoriale organike, që shoqërohet me befasime të këndshme, natyrshmëri, thjeshtësi e spontanitet.
Ka luajtur dhe në 7 filma, ndër to përmendim; “Shtëpia jonë e përbashkët” (Vaso), “Dritat e qytezës” (Seferi), “Lundrimi i parë” (Petro), “Shirat e vjeshtës” (Beni – projektusi), “Shpresa” (brigadier Vasili) etj.
Nga viti 2005 deri me 29 korrik 2013 viti që u nda nga jeta ishte punonjës në Qendrën Ndërkombëtare të Kulturës “Pjetër Arbnori”, Tiranë.
