Kujtojmë sot 99 vjetorin e lindjes të një nga themeluesit të Estradës profesioniste, autorit të qindra skeçeve, regjisorit, aktorit të mbi 1000 karaktereve, “Mjeshtrit të Madh”,“ Artistit të Popullit”, Tano Banushi. I përjetshëm qoftë kujtimi i tij!
Artisti lindi në qytetin e Shkodrës më 4 shkurt të vitit 1927 me emrin Athanas Lluko Banushi megjithëse publiku shqiptar e njeh me emrin Tano. Humori ka qenë pjesë e rëndësishme e jetës së artistit pasi është rritur në një familje e cila humorin e kishin si lajtmotiv të jetës së tyre me në krye babanë e tij, Lluko Banushi.
Që në kohën kur ai ndiqte gjimnazin artisti filloj të aktivizohej në shfaqje të ndryshme deri në momentin kur në Shkodër u themelua edhe estrada profesioniste e qytetit në virin 1958. Ishte pikërisht ky momenti kur Tano Banushi u kthye në një artist i cili u vlerësua shumë dhe u duartrokit nga i gjithë publiku artdashës shqiptar, pasi cilësitë e tij interpretative ishin shumë të larta.
Gjatë karrierës së tij artisti, Tano Banushi ka interpretuar mbi 1000 role duke mishëruar shumë personazhe, karaktere dhe figura artistike të cilat do ta kthenin në një figurë emblematike të humorit dhe estradës shqiptare.
Disa nga rrolet që do të veçonim nga ky artist janë ato në shfaqjet si “Fejesa” e Çehovit, “Një tragjedi Optimiste”, “Këshilli i ndrikullave”, “Hej moj babë”, e shumë e shumë të tjera.
Artisti gjatë karrierës së tij më të gjatë se gjysmëshekulli shkruante materiale dhe skeçe, por gjithashtu edhe kompozonte muzikën që shoqëronte materialet e krijuara prej tij, pasi zotëronte dhe luante mjaft mirë instrumentin e kitarës.
Publiku shqiptar e identifikon artistin me shumë materiale dhe personazhe, por ajo çka nuk do të ikë kurrë nga memoria e publikut është materiali “Fotografia” e cila mund të konsiderohet edhe si një ndër perlat e humorit dhe estradës shqiptare.
