më 13 gusht 2025, feston 69-vjetorin një nga figurat më të dashura të skenës dhe ekranit shqiptar – Bujar Asqeriu.
Me një karrierë që shtrihet në dekada, ai ka mishëruar role të paharrueshme në teatër dhe kinematografi, duke sjellë në skenë dhe në film emocione të forta, karaktere të ndërlikuara dhe një profesionalizëm të rrallë. Interpretimet e tij kanë mbetur në kujtesën kolektive si shembull i artit të pastër, i pasionit dhe i përkushtimit ndaj publikut.
Gjatë karrierës së tij, Bujar Asqeriu ka dhuruar personazhe që janë bërë pjesë e zemrës së publikut shqiptar. Me mjeshtëri të rrallë ka interpretuar role të paharrueshme si në “Ne shtepine tone”, “ Liri a Vdekje”, “Nje emer midis njerezve”, “Radiostacioni”, “Vëllezër dhe shokë”, “Në Prag të lirisë”,
“Në emër të lirisë”, “Misioni përtej detit”, “Jeta në duart e tjetrit”, ku çdo karakter merrte jetë e thellësi falë talentit dhe ndjeshmërisë së tij.
Në skenë, ai di të të mbajë pezull, në ekran të të prekë shpirtin, e pikërisht kjo e ka bërë të dashur e të respektuar brez pas brezi. Për publikun, Asqeriu nuk është vetëm një aktor, por një mik i vjetër që u sjell emocione të vërteta sa herë shfaqet.
Bujar Asqeriu nuk është thjesht një aktor i talentuar, por një mjeshtër i fjalës dhe i gjestit, i cili e ka ngritur artin e interpretimit në një nivel të lartë. Ai ka ditur të përcjellë me mjeshtëri dramat e jetës njerëzore, duke i dhënë publikut jo vetëm argëtim, por edhe reflektim e ndjesi të thella.
Sot, në këtë ditë të veçantë, ai festohet jo vetëm për vitet e jetës, por për gjithë trashëgiminë artistike që ka dhënë dhe vazhdon të japë për kulturën shqiptare.
