Urojmë sot aktorin e mirënjohur Kastriot Çaushi me rastin e ditës së lindjes. Gëzuar Kaçi edhe 100!
Kastriot Çaushi (1954). Aktor. Lindi në Tepelenë, më 14 qershor. Mbaroi Institutin e Lartë të Arteve për aktor, 1973-1976, dhe filloi punë si aktor në teatrin “Skampa” 1977, deri në vitin 1982, kohë kur u emërua pedagog në Institutin e Lartë të Arteve, në degën e Dramës. Në skenën e teatrit ka luajutr disa role, por la mbresa për një interpretim të ngrohtë, pasional dhe me vështrime të kahut psikologjik me rolin e Romeos në tragjedinë “Romeo dhe Zhuljeta” e Shekspirit, vënë në skenën e Teatrit Popullor, në vitin 1988.
U bë i njohur kryesisht nëpërmjet kinematografisë, ku luajti role kryesore në 17 filma artistikë. Në vitin 1980, falë hijeshisë së tij plastike, portretit tërheqës dhe një lojë të përmbajtur, rëndom e përputhur drejt një qasjeje romantike, ai i dha frymë humane shëmbëlltyrës heroike të figurës së Vasil Laçit, atentatorit të Viktor Emanuelit III, në filmin televiziv “Plumba perandorit”. Në hulli të afërta plastiko-ritmike, por se tashmë më i përkryer, madje me një prani edhe më aktive të shtresimeve medituese e psikologjike.
K. Çaushi realizoi figurën historike të Qemal Stafës, nën emrin Kujtim Stefa, në filmin “Qortimet e vjeshtës” (1981), me të cilin fitoi edhe kupën si aktori më i mirë në Festivalin III të Filmit Shqiptar. Afërsisht të kësaj prerjeje interpretative janë edhe dy role të tjera të rëndësishme të tij, Arturi te filmi “Apasionata” (1983) dhe Iliri te “Shirat e vjeshtës” (1984), me të cilët ka fituar çmime. Kësisoj, K. Çaushi ka arritur të japë me hijeshi dhe finesë tipin e intelektualit, guximtar, të ndershëm, por edhe mes kundërshtish e dyzimesh përballë marrjes së një vendimi të veshtirë.
Ndryshe veproi ai në konceptin e rolit kontrabandistit në filmin “Dashuria e fundit” (1994), me të cilin e theu modelin e mëparshëm prej heroi veprues, duke paraqitur një figurë me mbartje negative, të rrezikshëm e të pamëshirshëm, si trafikant prostitutash. Veprimet e forta, të vrazhda, menjëherë të dukshme u pasuan nga dinamika, ritmi dhe vlimi psikik.
Nga viti 1997-2007, u zgjodh rektori i Akademisë së Arteve në dy mandate, ndërsa në vitet 1999-2003 ishte kryetar i Këshillit Drejtues të RTSH-së. Aktualisht kryen detyrën e dekanit të Fakultetit të Artit Skenik në Akademinë e Arteve. Ështe bashkautor i teksteve universitare Elementet bazë të mjeshtërisë së aktorit (1998) dhe Aktori, roli, figura (2001). Ka fituar titullin “Profesor”.
