Foto unike në 70mm e aktorit Alfred Bualoti (lindur më 1953) në rolin e Vlashit në shesh xhirimin e filmit artistik “Pylli i Lirisë”, prodhuar në vitin 1976 me regji nga Gëzim Erebara (1919-2007).
Në një intervistë të aktorit lidhur me këtë moment të filmit ai do të shprehej: “Ka qenë diçka krejt spontane. Në skenar ishte parashikuar që njëra nga kamerat të ndiqte atentatin ndaj Vlashit dhe tjetra sfondin e pyllit përballë ku shfaqej diku “Kaprolli”. Kur u dëgjuan krismat, unë u rrëzova në ujë. Ashtu duhet të bëja.
Sakaq, kali që nuk e dinte “lojën” u shkëput nga vendi ku ishte dhe u afrua këmbë-këmbë për të më ndihmuar. Ishte një skenë e paparashikuar, por e mrekullueshme. Aty për aty mjeshtri Saimir Kokona, duke më thirrur të qëndroja pa lëvizur, nxitoi për ta hedhur në celuloid. Në pak sekonda u xhirua kështu një episod brilant, që nuk kishte nevojë për dubla, siç u thoshim…”.
Filmi me ngjyra i regjisorit Gëzim Erebara, rrëfen historinë e një fshatari që kap kuajt e egër dhe më pas bashkohet me partizanët pasi vëllai i tij vritet. Filmi i parë shqiptar i xhiruar në ekran të gjerë zhvillohet gjatë pushtimit të vendit në Luftën e Dytë Botërore.
