Edhe pse sot ndodhet përtej kufirit, historia 109-vjeçare e Konicës flet shqip, pasi qysh nga fillimi i saj, e deri në ditët e sotme brezat kanë ruajtur dhe transmetuar më së miri identitetin shqiptar.
Kjo gjë evidentohet fare lehtë kur në rrugët dhe lagjet e qytetit, dëgjon më shumë gjuhën shqipe, sesa atë greke. Midis elementëve të shumtë shqiptarë të pranishëm dhe aktualë, Konica rezervon edhe monumente me vlera të rralla, që për historinë dhe kulturën tonë janë asete të rëndësishme.
Nëse ndjek rrugën malore me kalldrëm nga qendra, në majë të kësaj qyteze kodrinore një godinë e veçantë të tërheq vëmendjen.
Me një arkitekturë të mahnitshme, shtrirje të gjerë dhe një kompozim ideal elementesh kulturore e historike, në krye të Konicës kuvendon shtëpia e Zenel Beut, ku jetoi Hanko, nëna e Ali Pashë Tepelenës.
Kjo shtëpi është e vendosur në një zonë ku qëndronin të vendosura shtëpitë e bejlerëve shqiptarë. Pas martesës me Veli Bej Tepelenën, Hankua lindi Ali Pashë Tepelenën, i cili prej nënës ka një lidhje të veçantë me këtë qytet.
Duke marrë parasysh kohën në të cilën kanë jetuar aty dhe kushtet e atyre kohëve, kjo godinë te prezanton me pushtetin dhe madhështinë e asaj familjeje.
Rezidenca ka mure të mëdha rrethuese dhe një portë hyrëse të madhe me hark nga sipër, një traditë të cilën e shohim të aplikuar gjerësisht në këtë zonë. Brenda këtyre mureve gjenden kolona, mure të tjera të lënë përgjysëm si dhe një pjese e shtëpisë së Hankos.
Kjo ndërtesë është restauruar nga vendasit për t’i rezistuar kohës, por gjithsesi elementët tradicionalë kanë mbetur mbizotërues si gurët e skalitur, apo edhe vizatimet karakteristike në gurët e gjithë këtij monumenti.
Ne kemi hyrë në brendësi të këtij monumenti dhe kemi eksploruar nga afër shtëpinë ku ka jetuar Hanko dhe Ali Pashë Tepelena./fjala.al
