Kryetari i Dhomës Kombëtare të Avokatisë, Maksim Haxhia ka shpërthyer dje në akuza të forta në adresë të reformës në drejtësi dhe iniciativës së Këshillit të Lartë Gjyqësor.
Teksa ishte i pranishëm në qytetin e Vlorës, ku u mbajt një tryezë e përbashkët mes dhomës së avokatisë së qytetit, KLGJ-së, Ministrisë së Drejtësisë, si dhe përfaqësuesve nga Gjykata dhe Prokuroria, avokat Haxhia shprehu bindjen se reforma në drejtësi ka dështuar.
Ai theksoi se harta e re gjyqësore është një atentat ndaj sistemit dhe qytetarëve. Sipas tij, korrupsioni lulëzon në gjykata sidomos në ato të Apelit.
“Reforma në drejtësi ishte e pastudiuar, dështoi. Nuk mund të bëhet reformë tjetër (hartë gjyqësore) për të zgjidhur kolapsin e të parës. Praktika ka dështuar. Gjykata e apelit ishte dështim, korrupsioni ka nisur në atë gjykatë. Apeli ka ende çështje të 2015 pa zgjidhur.
Shqipëria nuk është Tirana, nuk mund të ketë gjykatë vetëm në Tiranë. Po masakroni drejtësinë. Mos gënjeni, duhen të paktën 4 gjykata apeli, 4 gjykata administrative, se e dini çfarë do të ndodhë, Kuvendi mbulon çështjet e qytetarëve. Një gjyqtar duhet të ketë 10 këshilltar, adoptojini në sistem, ju si qeverisje e gjyqësorit duhet të ndërhyni për të ecur drejtësia.
Nuk folët për aksesin në drejtësi, që është një kriter që nuk ta pranon as Gjykata e Strasburgut, nuk mund të zgjidhet kjo me mjete që e shkatërrojnë. Nuk është jeta vetëm në Tiranë, t’iu japim qyteteve jetë, ju kaluat direkt në një gjykatë apeli”, deklaroi ai. Ndërkohë avokat Haxhia u shpreh i shqetësuar për faktin se drejtësinë po e bëjnë njerëz që se kanë kaluar vetingun.
“Unë kam shpresën që me ndikimin tonë, mirë është që të mos kalohet në ekstrem. Ti koordinojmë pak gjërat, të ruajmë balancat dhe të mos dëmtojmë komunitetet.
Asnjë i shkarkuar nuk është bërë për arsye personale, janë shkarkuar me 100 standarde, se kanë qenë emigrantë dhe se nuk justifikojnë dot shtëpitë. Ju po nxirrni problematikën e Vetingut, ata e shohin dhe në aspektin personal, duan që ta zgjasin, sepse marrin lekët e veta. Po vendosin njerëz që as vetë nuk e kanë kaluar Vetingun”, nënvizoi Haxhia.
