Këshilli i Emërimeve në Drejtësi (KED) ka bërë dje pikëzimin e kandidatëve për anëtarë të Gjykatës Kushtetuese. KED u mblodh dje për të shqyrtuar emrat që garojnë për vendin e lënë vakant nga Fatmir Hoxha dhe pas pikëve të dhëna nga secili anëtar u vendos që të renditet i pari Alket Jaupi me 87,67 pikë, më pas Sandër Beci me 84,33 pikë, Ervin Karamuco me 77,67 pikë dhe Albert Demirneli 72,5 pikë.
“Në zbatim të nenit 239 të ligjit nr. 115/2016 dhe të pikave 67-74 të Vendimit nr. 5 datë 02.04.2019 “Për kriteret dhe procedurën e vlerësimit, pikëzimit dhe renditjes së kandidatëve për pozicionet vakante në Gjykatën Kushtetuese dhe të Inspektorit të Lartë të Drejtësisë”, në mbledhjen e ardhshme të Këshillit, do të miratohen:
a) Lista përfundimtare e renditjes së kandidatëve për vendin vakant në Gjykatën Kushtetuese të ish gjyqtarit Fatmir Hoxha
b) Raporti i arsyetuar për procedurën e verifikimit, të vlerësimit dhe pikëzimit të secilit kandidat dhe të renditjes së tyre. Pas shqyrtimit dhe miratimit të këtyre akteve nga mbledhja e Këshillit të Emërimeve në Drejtësi, organit të emërtesës, Gjykatës së Lartë, do t’i dërgohen listat përfundimtare të renditjes së kandidatëve dhe raportet e arsyetuar të Këshillit ku përmbahet analiza tërësore lidhur me plotësimin e kushteve ligjore dhe vlerësimin e kritereve ligjore për secilin kandidat, si edhe për procedurën e ndjekur për vlerësimin dhe renditjen e tyre, për vendin vakant të ish-gjyqtarit Fatmir Hoxha”, njoftoi KED.
Sinjalet janë se Gjykata Kushtetuese do të plotësohet me 8 anëtarë brenda këtij viti dhe tashmë sytë janë më 18 Janar, kur do diskutohet shkarkimi i presidentit Meta.
Valë emërimesh nga KLGJ
Dje ka bërë një mbledhje edhe Këshilli i Lartë Gjyqësor, i cili ka bërë një sërë emërimesh në sistemin gjyqësor. Në vijim të plotësimit të vendeve vakante në gjykatat e Posaçme për Korrupsionin dhe Krimin e Organizuar, Këshilli vendosi ngritjen në detyrën e gjyqtares së Gjykatës së Posaçme të Apelit për Korrupsionin dhe Krimin e Organizuar, znj. Igerta Hysi, si dhe pas miratimit të renditjes së kandidatëve, ngritjen në detyrën e gjyqtarit të Gjykatës së Posaçme të Shkallës së Parë për Korrupsionin dhe Krimin e Organizuar, z. Erjon Bani.
Më qëllim mirëfunksionimin e gjykatave të apelit Vlorë dhe Korçë, pas miratimit të renditjes së kandidatëve, Këshilli vendosi ngritjen në detyrën e gjyqtares të Gjykatës së Apelit Korçë, Arta Duka dhe ngritjen në detyrën e gjyqtarit të Gjykatës së Apelit Vlorë, Genti Dokollari.
Gjithashtu, për shkak të ngritjes në detyrë, Këshilli vendosi përfundimin para afatit të shërbimit në skemën e delegimit, për gjyqtarët Arta Duka dhe Erjon Bani. “Këshilli vendosi deklarimin e përfunduar pa një vendim përfundimtar të procedurës së verifikimit të kushteve dhe kritereve ligjore të pozicionit, të pasurisë dhe figurës, për kancelarin në Gjykatën Administrative të Shkallës së Parë {…}, si dhe zgjatjen e afatit të lejes prindërore për gjyqtaren znj. Ejona Lazellari.
Në kuadër të miradministrimit të fondeve buxhetore, Këshilli vendosi detajimin e fondeve buxhetore të vitit 2022, për sistemin gjyqësor. Pas fillimit të detyrës nga anëtarët e rinj nga radhët e gjyqtarëve, Këshilli vendosi ndryshimin e vendimit nr.13, datë 18.01.2019, “Mbi ngritjen dhe përbërjen e Komisioneve të Përhershme””, njoftoi KLGJ.
