Sali Berisha është një politikan që ka gënjyer që ditën e parë që u përfshi në politikë, sipas analistit Frrok Çupi.
I ftuar në “Top Talk”, analisti është treguar i ashpër në komentin e tij, kur e ka quajtur ish-kryeministrin Berisha, një politikan që çdo gjë që ka bërë në karrierën e tij politike ka qenë alibi. Madje ai shkon më tej kur thotë se Berisha nuk ka qenë themelues i Partisë Demokratike.
“Po të hysh në arketipin e Berishës, gjithë jeta e tij është alibi. Krijoi alibinë që është njeri i ndershëm, dhe doli që është më i korruptuari në tërë këtë histori. Ka alibinë që është themelues i Partisë Demokratike, në fakt ka qenë kundër themelimit të kësaj partie.
Sali Berisha erdhi në kohën kur sapo ishte themeluar PD-ja dhe u tha studentëve që e themeluan se nuk duhet parti. Kishte ardhur nga Ramiz Alia. Është një histori e njohur dhe e stërnjohur. Jam vetë dëshmitar. Ishte kundër themelimit të një partie.
Ai ishte pro pluralizmit të mendimit dhe të odave. Gjithë kapaciteti politiko-intelektual-pluralist i Berishës ishte e përqëndruar tek oda. Berisha gjithçka e ka alibi. Është një histori e tërë që e dëshmon!”
Berisha, që dha dorëheqjen nga drejtimi i së djathtës, që në vitin 2013, ku humbi thellë në zgjedhjet parlamentare, ka shprehur hapur vullnetin e tij për t’u rikthyer në krye të partisë. Në foltoret që ka zhvilluar me demokratët në qytete të ndryshme të Shqipërisë, ai është shprehur se “duhet të rrëzojmë kreun aktual Lulzim Bashën”.
Por, sipas Çupit, as që mund të imagjinohet se Berisha mund të rikthehet sërish në qeveri:
“Te foltorja, gjysma janë të njëjtët persona që shkojnë në çdo rreth, të tjerët as nuk janë anëtarë të forumit. Edhe sikur të gjithë këta të jenë demokratë, prapë mbeten disa salla. Ndërsa Basha nga ana tjetër ka një mandat, ka të drejtën e legjitimuar, ka me vete një detyrim kombëtar për të qëndruar përballë këtyre njerëzve.
Ajo që mund të them është se Basha një ditë do të largohet, por po aq e vërtetë është se Ilir Meta dhe Sali Berisha nuk vijnë më në politikë.
A mund të imagjinohet që të kemi një ditë sërish Sali Berishën në krye të shtetit? Kurrë!”
Berishën si politikan, analisti e cilëson një krijesë tërësisht boshe:
“Berisha as mendimtar nuk është, as lexues nuk është. Të tëra këto kanë qenë alibi. Berisha është një njeri bosh, me boshllëkun e tij ka ardhur deri më sot. Tani ndodhet para vdekjes së tij (jo fizike). Do të shohim se çfarë do të ndodhë me të.
Ne po shikojmë si po “dekompozohet” ky njeri, që edhe pse ka qenë në krye të shtetit, një ditë bëhet një monstër që nuk mund ta shohësh me sy. Është krejt i përhumbur. Flet në mënyrë të pandërgjegjshme”.
