Zbardhet marrëveshja e plotë mes qeverisë shqiptare dhe asaj britanike sa u takon emigrantëve. Dy ditë më parë pati shumë debate mbi këtë çështje, pasi sipas medieve britanike, palët kanë rënë dakord për të strehuar refugjatë.
Qeveria e mohoi që vendi ynë do kthehet në një kamp, por në Kuvend ka shkuar një marrëveshje shumë e dyshimtë. Relacioni nuk e shpjegon qartë se për çfarë bëhet fjalë, ndërsa në brendësi të saj ka një sërë pikash që ngrenë mjaft pikëpyetje.
Sipas asaj që thuhet aty, palët bien dakord që të pranojnë rikthimin në territorin e tyre edhe të emigrantëve nga shtetet e tjera ose palë të treta siç përcaktohen në draft. “Secila Palë Kontraktuese do të ripranojë në territorin e shtetit të saj me kërkesë të Palës tjetër kontraktuese dhe pa formalitete të panevojshme, çdo shtetas të palës së tretë, i cili nuk plotëson, ose nuk i plotëson më, kushtet në fuqi për hyrje ose për qëndrim ne territorin e shtetit të Palës Kontraktuese Kërkuese me kusht që ajo është dokumentuar, në përputhje me paragrafin (1) të Nenit 9, të kësaj Marrëveshjeje, ose prezumohet në mënyrë të arsyeshme, në përputhje me paragrafin (2) të Nenit 9, që një shtetas i tillë i një pale të tretë kishte hyrë ose kishte qëndruar në territorin e shtetit të Palës Kontraktuese të kërkuar”, thuhet aty.
Në marrëveshje tregohen dhe mënyrat se si do të bëhet verifikimi i personave në fjalë. Ajo që bie në sy është se në vendin tonë do të rikthen ata persona që kanë kaluar nga Shqipëri për të shkuar më pas drejt Anglisë. Pra të gjithë ata emigrantë që kanë përdorur Shqipërinë si rrugë kalimi dhe janë kthyer nga britanikët do kthen pas në vendin tonë. Këtu bëhet fjalë për shumë kategori njerëzish, ndërkohë mbet pak e paqartë se si do të bëhet verifikimi.
Shqipëria vend tranziti
Një pikë tjetër akoma më e rëndësishme është se shteti ynë do shërbejë si vend tranziti për të kthyer emigrantët në vendet e tyre. Momentalisht në vendin tonë ka ardhur një valë e madhe refugjatësh nga Siria dhe vende të tjera të Lindjes së Mesme.
Vendi ynë përdoret si rrugë kalimi dhe shumë prej atyre që përfundojnë në Angli dhe atje u refuzohet azili apo kthehen mbrapsht, ata do sillen në Shqipëri dhe më pas nga vendi ynë te vendet e tyre të origjinës. “Secila Palë Kontraktuese do të lejojë me kërkesë të Palës tjetër Kontraktuese, tranzitin nëpërmjet territorit të shtetit të saj për shtetasit e Palës së tretë të larguar nga Pala Kontraktuese kërkuese për qëllim të ripranimit për në vendet e tyre të origjinës ose për te shtetet e palës së tretë nëse:
a) pranimi në ndonjë shtet tjetër tranziti dhe në shtetin e destinacionit është i siguruar; dhe b) Pala Kontraktuese kërkuese merr për shtetasin e palës së tretë ndonjë leje tranziti të kërkuar, në përputhje me paragrafin (2) të Nenit 13”, thuhet në marrëveshje. Më pas aty sqarohet se shteti që largon emigrantët do të jetë përgjegjës për gjithë procesin e zhvendosjes së tyre në vendin e origjinës.
“Pala Kontraktuese kërkuese do të ketë përgjegjësi të plotë për tranzitin e personave të tillë për në vendin e destinacionit përfundimtar dhe do të jetë përgjegjëse për largimin e atyre personave nga territori i shtetit të Palës Kontraktuese të kërkuar në rastet kur udhëtimi i mëtejshëm nuk mund të vazhdojë”, thuhet në draft.
Ndërkohë mësohet se javën që vjen komisionet parlamentare do të nisin diskutimin e draftit dhe më pas miratimin tij. Ndërkohë marrëveshja tregon qartë se refugjatët që kthehen nga Britania do vijnë në vendin tonë, pavarësisht nëse do vijnë të gjithë apo pjesërisht.
