Inspektori i Lartë i Deklarimit dhe Kontrollit të pasurive ka ndezur dritën jeshile për deklarimin online të pasurisë së pushtetarëve.
Momentalisht me mijëra zyrtarë e politikanë çdo vit deklarojnë pasuritë pranë ILDKP me formular fizik dhe një pjesë e madhe e tyre i shpëtojnë lupës së inspektorëve, prokurorisë dhe të medias. Ka shumë emra që janë kapur në fshehje pasurie dhe sot shijojnë të qetë paratë.
Por duket se tashmë do të ndryshojë procesi i deklarimit të pasurisë. Pas disa vitesh punë, ILDKP duket se ka gati sistemin e nxjerrjes online të deklaratave të zyrtarëve. Bëhet fjalë për një sistem që do aksesohet nga të gjithë dhe kushdo mund të denoncojë pasuri të parregullta, si dhe drejtësia do e ketë shumë të lehtë të gjurmojë pasuritë e politikanëve. ILDKP ka miratuar një udhëzim, ku tregon se si do të procedohet me deklarimin online.
Detajet e udhëzimit
Sipas udhëzimit, subjektet të cilët fillojnë marrëdhëniet e punës pas datës 1 janar 2022, mbartin detyrimin të bëjnë deklarimin para fillimit të detyrës dhe duhet të kryejnë deklarimin në sistemin elektronik EACIDS, brenda 30 ditëve nga fillimi i detyrës, në përputhje me afatet e përcaktuara në ligj, si vijon: në formë elektronike, duke kryer plotësimin dhe aprovimin e versionit përfundimtar të deklaratës në sistemin EACIDS, të vënë në dispozicion nga ILDKPKI-ja; dhe
në formë shkresore, në zbatim të kuadrit ligjor në fuqi, deklarata e plotësuar në formë elektronike duhet printuar e nënshkruar në çdo fletë të saj, sipas rubrikave përkatëse dhe dorëzohet e mbyllur në zarf pranë autoritetit përgjegjës të institucionit publik.
Më tej bëhet me dije se subjektet, të cilat mbartin detyrimin ligjor të bëjnë deklarimin periodik vjetor të interesave privatë dhe konfliktit të interesave, duhet të kryejnë deklarimin në sistemin EACIDS, brenda datës 31 mars të çdo viti, në po të njëjtën formë, si online ashtu dhe në formë fizike.
“Subjektet deklaruese, në mbështetje të legjislacionit në fuqi, për çdo vit bëjnë dorëzimin e deklarimit periodik vjetor dhe kur është rasti, deklarimin para fillimit të detyrës, deklarimin pas largimit nga funksioni, deklarimin me kërkesë dhe deklarimin e pasurisë dhe interesave privatë të kandidatit për pozicione të ndryshme në institucionet e sistemit të drejtësisë, duke e printuar, nënshkruar në çdo faqe dhe dorëzuar në formë shkresore në autoritetin përgjegjës të parandalimit të konfliktit të interesave, sipas afateve ligjore të përcaktuara në ligjin nr. 9049, datë 10.4.2003, i ndryshuar”, thuhet në udhëzimin e kryetares së ILDKP.
Ky projekt është mbështetur nga SHBA e BE dhe pritet të sjellë zhvillime të forta në politikë. Aktualisht deklarimet pasurore merren me kërkesë dhe kryesisht në publik dalin vetëm deklaratat e drejtuesve të shtetit. Tani çdo gjë do jetë e aksesueshme dhe po ashtu pritet të rriten raportimet në prokurori kur kemi pasuri të pajustifikuar. Në politikë ka shumë emra me pasuri sheikësh dhe teksa PD kërkon veting në politikë, ILDKP ka hedhur një tjetër hap interesant drejt transparencës.
