Institucionet kryesore të drejtësisë duket se janë mobilizuar për të plotësuar sa më shpejt Gjykatën Kushtetuese me 9 anëtarë.
Teksa pak ditë na ndajnë nga shkarkimi i presidentit në Kuvend, merr një rëndësi shumë të madhe Gjykata Kushtetuese. Kjo e fundit ka momentalisht 7 anëtarë dhe me emrat që janë aty aktualisht nuk dihet qartë nëse do kemi shkarkim të Metës apo jo. Për të mos e lënë në dorë të fatit, po luftohet fort që Kushtetuesja të ketë 9 anëtarë në mënyrë që të kemi një vendim sa më korrekt, por dhe të pandikuar politikisht.
Gjykata e Lartë shpalli procedurat për 3 vendet e saj vakante. Por që të kemi përzgjedhjen e emrave, duhet që Gjykata e Lartë të ketë së paku 10 anëtarë. Ajo ka 7 dhe i duhen 3 të tjerë. Por gazeta ka mësuar se Këshilli i Lartë Gjyqësor i ka gati emrat, por problemi qëndron te procesi i rivlerësimit. Nga 7 kandidatë në pritje, për 5 po priten vendimet e organeve të vetingut. Sipas burimeve, KLGJ dhe KPA e KPK kanë nisur bashkëpunimin që emrat që janë në listë për në Gjykatën e Latë të jenë prioritarë.
Kjo pritet të shmangë vonesat dhe shpresat janë që në vjeshtë Gjykata e Lartë të jetë me më shumë se 10 anëtarë. Një gjë e tillë është bërë e ditur dhe në raportin vjetor të KLGJ, siguruar nga gazeta. “Këshilli i Lartë Gjyqësor administroi 23 dosje kandidatësh nga radhët e gjyqësorit. Nga 11 procedurat e nisura, u përfunduan 4 emërime përmes procedurës së ngritjes në detyrë në fushën e së drejtës penale.
Ndërsa 7 procedurat e tjera janë ende në shqyrtim në pritje të përfundimit të procesit të rivlerësimit kalimtar, vlerësimeve etike-profesionale për kandidatët si dhe vështirësive të tjera objektive. Me plotësimin e këtyre vendeve vakante, do të mundësohet kuorumi i nevojshëm i mbledhjes së gjyqtarëve për të përmbushur detyrimet ligjore në lidhje me emërimet e anëtarëve të Gjykatës Kushtetuese. Sot këto procedura janë në pritje për shkak të vijimit të procesit të rivlerësimit”, thuhet në rezolutë.
Rezoluta e Kuvendit dhe KED
Kuvendi ditën e enjte pritet të votojë një rezolutë për Këshillin e Lartë Gjyqësor dhe gazeta ka mësuar se një ndër detyrat është që të plotësohet sa më shpejt Gjykata e Lartë. Pra Kuvendi ia ka vënë detyrë KLGJ që të mos e zvarrisë më këtë proces. Nga ana tjetër gazeta ka mësuar se ka një angazhim ndërkombëtar. Përfaqësitë diplomatike po punojnë në prapaskenë që Kushtetuesja të jetë me 9 anëtarë para se të marrë vendim për Metën.
Ndërkohë duhet theksuar se dhe Këshilli i Emërimeve në Drejtësi është gati dhe po pret listën që do i shkojë nga Gjykata e Lartë. Në fillim të korrikut Gjykata e Lartë do të mbyllë aplikimet dhe emrat do ia dërgojë KED, e cila sipas një burimi, do të nisë menjëherë nga puna duke mos krijuar asnjë vonesë. Sipas burimeve, një strategji është që të dërgohen kryesish gjyqtarë ose prokurorë me shumë vite përvojë dhe që kanë kaluar vetingun, duke shkurtuar procesin e verifikimit nga KED. Pra duket se kemi një koordinim të gjerë dhe gjasat janë që Kushtetuesja të jetë e plotë para vendimit për Metën.
