Avokati i njohur Spartak Ngjela ka komentuar ditën e djeshme vendimin e SPAK për rinisjen e hetimeve të “21 Janarit”.
Ngjela u shpreh se vrasjet e “21 Janarit” janë një krim historik ku ngelën të vrarë 4 veta prandaj procesi duhet të hapet i gjithi. Ai tha se rihapja e procesit është një shenjë e mirë e luftës kundër krimit dhe korrupsionit. Sipas Ngjelës, kjo është një gjë shumë e mirë pasi jep besim. “Duhet të hapet i gjithë procesi, janë vrarë katër veta. Në një protestë ku nuk kishte përplasje mes shtetit dhe qytetarëve.
Edhe sikur të kishte, nuk vriten njerëzit. Është krim historik. Hapja e gjithë këtyre proceseve është shenjë e mirë e luftës së drejtësisë kundër krimit dhe korrupsionit. Është diçka shumë e mirë, na jep besim. Se ky ka qenë një shtet i pushtuar nga krimi”, u shpreh Ngjela. Ai tha se pushteti gjyqësor i asaj kohe ka qenë i mbuluar nga krimi dhe nga korrupsioni prandaj vetëm SPAK mund të merrte hapa të tillë për të zbardhur drejtësinë.
Ngjela u shpreh se ekspertiza kombëtare dhe hetimet profesionale do të bëjnë të mundur që qytetarët të krijojnë besim tek drejtësia. Sipas avokatit i pari që duhet hetuar është ish-kryeministri Sali Berisha dhe më pas ish-ministri i Mbrojtjes Fatmir Mediu. “Pushteti gjyqësor shqiptar ka qenë i mbuluar nga krimi, vetë i përfshirë në krim përmes korrupsionit. Dalja e SPAK në skenë, e cila është e kontrolluar në funksion të drejtësisë, do ta ndërmerrte këtë hap. Se ajo është një ngjarje me efekte negative në histori.
Do kemi ekspertizë ndërkombëtare dhe do shohim një hetim profesional dhe ne shqiptarët të krijojmë kështu besim te drejtësia. Duhet të hetohet Berisha i pari dhe pastaj dhe ministri i Mbrojtjes”, tha Ngjela. Kujtojmë se edhe më parë Ngjela e ka paralajmëruar që SPAK do ta rihapte dosjen. Ai është shprehur se SPAK është në interes të shqiptarëve prandaj do të zbardhë të vërtetën e kësaj çështjeje. Sipas avokatit dosja e “21 Janarit” dhe e Gërdecit do të merren në dorë nga specialistët e Byrosë Kombëtare të Hetimit, të ndihmuar nga FBI amerikane.
