Kritikët e kreut demokrat Lulzim Basha kanë intensifikuar lëvizjet për largimin e tij nga Partia Demokratike. Në një konferencë për mediat mesditën e djeshme, grupi i cili kërkon dorëheqjen e Bashës, duket se është frikësuar nga një bashkëqeverisje e mundshme mes PS dhe PD.
Ishte ish-presidenti Bujar Nishani, i cili u shpreh se nëse do të ketë një bashkëpunim mes PD dhe PS do të ishte një “thikë pas shpine” për demokratët. Ai tha se një tentativë e tillë për bashkëqeverisje ka qenë droja më e madhe e opinionit publik. Sipas tij një bashkëqeverisje do ta kthente PD në një aneks të kryeministrit Edi Rama.
“Nëse ka një tentativë të tillë do të realizonte atë që është droja më e madhe e opinionit publik, një droje që ka ekzistuar brenda PD, për ta kthyer në një aneks të Edi Ramës, asgjësimi i PD, por unë jam e bindur që kjo tentativë për ta asgjësuar apo për ta kthyer në një aneks të padëgjueshëm për qytetarët.
Do ishte thika më e helmatisur pas shpine”, tha Nishani. Po ashtu edhe anëtari i grupimit për PD, Arben Imami deklaroi se ka pasur informacion për tentativën e bashkëpunimit mes PD dhe PS. Sipas tij kjo tentativë ka nisur që në 17 maj, por ka dy dështime të mëdha. “Kemi informacion. Përpjekja ka filluar në 17 maj, ka qenë e pandërprerë, ka pasur këtë qëllim dhe ka dy dështime të mëdha, vijimi i kësaj rruge kuptohet se ku të çon në 2025”, tha Imami.
Ai po ashtu ka mbajtur një qëndrim të ashpër ndaj kreut demokrat ku e ka kërcënuar se do të jetë vrima e miut 500 grosh nëse mendon koalicion me PS. Ai tha se e vetmja rrugë për Bashën është të japë dorëheqjen në shërbim të PD. Sipas tij nëse kreu demokrat nuk e jep dorëheqjen, do të ketë ndeshje politike serioze. “Do bëjmë gjithçka, më shumë se gjithçka, po i them Lulzim Bashës do të jetë vrima e miut 500 grosh nëse mendon koalicion me PS me zgjatje jo u vodhën votat, do i futet në fushatë. E vetmja rrugë është dorëheqja që i shërben partisë, përndryshe do të ketë ndeshje serioze, ndeshje politike, mbani mend sa u rrit respekti për Fatos Nanos pas dhënies së dorëheqjes apo të Berishës”, tha Imami.
Kritikët propozojnë reformimin e PD
Gjatë konferencës për mediat, grupi i cili kërkon dorëheqjen e liderit demokrat, propozoi një sërë pikash për reformimin e PD. Propozimet u prezantuan nga ish-anëtarja e Këshillit Kombëtar Edith Harxhi, e cila u shpreh se duhet bërë bashkimi i të gjithë atyre demokratëve që janë larguar, kthimi i së djathtës konservatore dhe ndryshimi i Statutit të PD në mënyrë që anëtarët e Këshillit të kenë kompetenca për të ndryshuar kryetarin. Në 2017 u ndryshua statuti i PD dhe u forcuan pozitat e kryetarit. Nëse humb zgjedhjet nuk mban përgjegjësi dhe tashmë kritikët e kanë të vështirë ta shkarkojnë, prandaj kërkohet rishikimi i Statutit.
Harxhi tha se PD nuk frymëzoi, nuk siguroi mbështetje për fitore dhe pati të njëjtin rezultat si zgjedhjet e mëparshme. Sipas saj përgjegjësitë për këto i ka vetëm kreu i PD Lulzim Basha, i cili duhet të marrë përgjegjësi mbi humbjen në mënyrë që të fillojë ringritja e PD. “Ne propozojmë reformimin e PD-së, bashkimin e të gjithë të djathtëve të larguar, ndryshime në Statutin e PD e kthimin e vlerave të së djathtës konservatore në Partinë Demokratike. Vetëm kjo PD mund të fitojë.
Ajo ka pasur rezultat të njëjtë me 4 vite më parë, pjesëmarrja me 46% në zgjedhje është tregues domethënës që PD nuk frymëzoi dhe as nuk siguroi mbështetje për fitore. Ne jemi të vetëdijshëm që përgjegjësia e zgjedhjeve u takon drejtuesve të partisë. Ata duhet të marrin përgjegjësi për humbjen, pasi kanë shembullin e zotit Berisha. Dorëheqja e parevokueshme e Lulzim Bashës nga partia nuk është fundi i PD-së, por fillimi i ringritjes së saj”, tha ajo
