Princ Harry ka nisur një punë të re, pasi ai hoqi dorë nga titujt mbretërore dhe u largua përfundimisht nga pallati së bashku me Meghan. Kompania “BetterUp”e fokusuar tek teknologjia, ka zbuluar ditën e sotme se Duka i Sussex do të shërbejë si shef i ndikimit.
“Ne jemi shumë entuziastë nga modeli i tij i frymëzimit dhe ndikimi përmes veprimit. Si një qytetar i vërtetë i botës, ai i ka dedikuar jetën e tij punës për të sjellë vëmendjen tek nevojat e ndryshme të njerëzve dhe për të përkrahur iniciativat e shëndetit mendor.
Si anëtar i skuadrës drejtuese të BetterUp, Princ Harry do të zgjerojë punën që bën për vite me radhë, pasi ai edukon dhe frymëzon komunitetin tonë për rëndësinë e përqëndrimit në shëndetin mendor dhe potencialin njerëzor”, ka thënë themeluesi i kompanisë për Harry-n.
Ky i fundit gjithashtu është shprehur shumë i lumtur që i është dhënë mundësia për t’u bërë pjesë e kësaj kompanie dhe për të ndihmuar njerëzit për t’i kthyer dhimbjet në qëllim të mirë dhe për t’i dhënë prioritet shëndetit mendor. Vetë Harry ka treguar se ka pasur shumë probleme me shëndetin mendor pas vdekjes tragjike të nënës së tij, Princeshë Dianës. Në lidhje me këtë temë ai diskutoi së bashku me partneren Meghan Markle, në intervistën përballë Oprah Winfrey, që bëri xhiron e botës.
Meghan tregoi se ajo kishte pasur probleme të theksuara me shëndetin mendor për një kohë të gjatë, aq sa mendonte të vriste veten dhe se pallati mbretëror nuk e kishte ndihmuar. Më pas ajo kishte gjetur zgjidhjen pasi kishte folur hapur për këtë çështje me Harry-n.
