Presidenti Ilir Meta dhe ish-kryeministri Ilir Meta duket se janë në unison sa i takon zgjedhjeve të 25 prillit. Prej muajsh po qarkullon ideja e një bashkëqeverisje PD-PS pas zgjedhjeve për të sjellë një frymë të re qeverisëse në vend, kjo edhe për të mirën e integrimit.
Por Berisha dhe Meta duket se nuk e pranojnë një skemë të tillë. Dje ishte ish-kryeministri Berisha, ai i cili e tregoi hapur. I ftuar në një studio televizive, ai deklaroi se nuk duhet të ketë një bashkëqeverisje mes PD dhe PS, por sipas tij, Basha duhet të marrë në qeveri aleatët dhe LSI. “Kjo është sikur të kërkosh rrethin në katror. Nuk mund të ndodhë ajo.
Rama ka problem të mëdha shumë dhe duhet të përgatitet mirë. PD është parti kombëtare dhe Rama figurë antikombëtare. Në historinë e Shqipërisë Rama është figurë antikombëtare. Këtë qëndrim që ka mbajtur ndaj veriut të Shqipërisë është aq antikombëtar sa asnjë kryeministër që nga qeveria e Lidhjes së Prizrenit që spastroi çdo personalitet, drejtues të institucioneve qendrore apo anëtarë kabineti me origjinë nga Kamza e sipër dhe ka emëruar vetëm një zv/ministër të Shëndetësisë. Në asnjë mënyrë nuk duhet të ketë bashkëpunim. PD do të qeverisë në përputhje me marrëveshjen me aleatët dhe me LSI”, tha ai.
Ndërsa një tjetër pikë që e Bashkon Berishën me Metën është reforma në drejtësi. Ish-kryeministri është i mendimit se reforma në drejtësi është e kapur nga qeveria. “Unë kam mbajtur qëndrimet e mija kundërshtuese ndaj të gjitha akteve antikushtetuese në këtë reformë, disa prej të cilave u konfirmuan dhe nga Venecia. Kam mbajtur dhe kam denoncuar përdorimin e vetingut për pastrimin racist të të gjithë gjykatësve dhe prokurorëve sipas bindjeve dhe shtrimin e drejtësisë në ushtar të bindur të partisë. Kam denoncuar emërimet dhe shkeljet e drejtuesve të këtyre drejtuesve të institucioneve, por unë kam paralajmëruar dhe nuk dua të jem profet dhe koha do e provojë se kjo drejtësi po shkon drejt falimentimit”, tha dje Berisha.
Flet Presidenti Meta
Por lidhur me bashkëqeverisjen ka folur edhe presidentit, i cili tha dje se nëse Basha shkon te Rama do të thotë që Basha ka qenë gjithmonë i tij. “Nëse ai e merr me vete do të thotë se e ka pasur gjithmonë me vete. Nuk do të ndodhë ndonjë hata. Shoqëria do pozicionohet me raporte të reja. Asgjë nuk është fatalitet. 25 prilli është provë zjarri për atë që ka bërë deri tani dhe atë që do të bëjë më pas. Deri tani kemi parë njerëz me 3 fytyra”, tha ai. Po ashtu, Meta sulmoi djegien e mandateve duke goditur Bashën.
“Vendimi ka qenë i koordinuar dhe me disa ambasadorë. Ka qenë vendim tepër nxituar. Nuk ishte inicim i Monikës”, tha ai. Presidenti Meta ka shkuar edhe më tej, duke kërcënuar me përmbysje nëse PS e mban pushtetin. Meta ka folur dhe për rrëzim të qeverisë me dhunë, ndërsa ka përmendur protestat për vrasjen e Klodian Rashës. “Unë kam popullin. Do e orientoj në mënyrën më të drejtë. Ju do e shihni popullin. Mos dëgjoni atë që thotë nuk i ngrihet popullit. U ngrit stresi e përmbysi gjysmën e qeverisë. Mos provokoni popullin… Nuk pres zgjidhje nga ndërkombëtarët sepse nuk jam naiv për shkak të informacionit që kam.
Nuk ekziston telefon nëse preket një votë për secilin që të mos guxojë të preket një votë. Nëse preket një votë unë si president marr çdo dënim dhe përgjegjësitë i marr vetë. Përgjegjësitë nuk ja lë popullit. Ne jemi zotë në vendin tonë dhe ata të na respektojmë që do i dalim zot këtij vendi”, tha ai. Në emisionin “Të Paekspozuarit”, presidenti Meta tha se kryeministri Rama duhet të ndjekë shembullin e Ramiz Alisë. Madje, Meta tha se Rama nuk ka më luksin e hyrjes në zgjedhje pa opozitë dhe nuk i mbetet rrugë tjetër veç largimit.
“Të gjitha pushtetet i ka futur në xhep. Popullin s’e fut dot. Kemi rastin e Kirgistanit, nuk ia vlen të krahasohemi. Por për Kirgistanin tregoi dinjitet dhe populli ynë do ta tregojë gjithashtu. Të jeni të sigurt që beteja nuk është e lehtë. Shkelja e marrëveshjes është një panik i tmerrshëm. Mbajmë mend edhe ‘94 dhe referendumin për Kushtetutën. Edhe doktori i madhërishëm e besoi se do të fitonte, por produkti ishte krejt tjetër. Në demokraci pushteti në pamje të parë duket i fortë. Por ka forcë kur ka moral. Populli është i zemëruar. Kanë ngelur edhe 40 e ca ditë”, tha dje Meta./Kliti Topalli
