Afrimi i zgjedhjeve të 25 prillit ka rikthyer debatet mes presidentit Ilir Meta dhe mazhorancës. Këtë herë replikat dhe ironitë janë shkëmbyer mes kreut të grupit parlamentar të PS-së, Taulant Balla dhe zëdhënësit të presidentit Tedi Blushi.
Balla përmes një postimi në Facebook ka ironizuar Ilir Metën dhe ka nxjerrë mesazhin e një qytetari nga Librazhdi, ndërsa pretendon se kreu i shtetit ka marrë dikë në telefon për t’i dekoruar gjyshin që kishte ndërruar jetë vite më parë. Ironia është thelluar dhe më tej kur Balla tregon se në përgjigjen që i ka kthyer qytetarit i kërkon të mos habitet pasi numrat e atyre që janë në jetë nuk i dalin sepse LSI ka vdekur që në 2017.
“Po nuk shkon mor burrë i dheut që Presidenti të hyjë në Librazhd sikur po shkon fshehurazi dhe të mbajë një trastë me dekorata në sedijen e pasme! Kështu më shkruan një bashkëqytetari im nga Librazhdi. Ishte habitur fare mileti atje sot që ka marrë Presidenti në telefon dikë për t’i dekoruar gjyshin e ikur nga kjo botë para shumë vitesh! Mos u habit i thashë, nuk i dalin numrat e të gjallëve Monës se ka vdekur LSI e 2017-ës dhe s’ka ç’bën edhe Likja se duhet të ngjallë të vdekurit”, shkruan Balla në postimin e tij.
Menjëherë pas deklaratës së Taulant Ballës ka ardhur reagimi nga Presidenca. Këshilltari për mediat dhe zëdhënësi i presidentit, Tedi Blushi, ka shkruar përmes një statusi në Facebook se presidenti i vendit ka të drejtë të vizitojë çdo familje shqiptare që është e zhgënjyer dhe e revoltuar nga kjo qeveri. Blushi gjithashtu ka treguar mes ironie se Ilir Meta ishte i ftuar nga familja të cilën vizitoi dhe nuk ka shkuar atje për ndonjë arsye tjetër, as për dekorimin e ndonjë prej pjesëtarëve.
“Kur “Miss Parlamenti” Tao Tao, mashtron Tao Taon! Presidenti i Republikës Sh.T.Z Ilir Meta ka qenë sot në Librazhd, por i ftuar nga familje me tradita sportdashëse dhe të rinj të këtij qyteti, jo siç mashtron i dënuari për shpifje Tao Tao. Presidenti Meta do të shkojë jo vetëm në Librazhd, por në të gjitha zonat e Shqipërisë ku qytetarët e revoltuar me shkeljet e Kushtetutës e kërkojnë për t’i shprehur shqetësimet dhe hallet e tyre’, tha Blushi.
Presidenti në fushatë
Në replikën e tij ndaj Ballës, zëdhënësi i presidentit ka përmendur edhe zgjedhjet e 25 prillit. Sipas Blushit Librazhdi ka qenë me LSI, sepse mbështet Kushtetutën dhe po në mbështetje të LSI do të jetë edhe më 25 prill, duke pranuar këtu se presidenti në një farë forme ka nisur fushatë për zgjedhjet e ardhshme.
“Në çdo referendum, Librazhdi ka qenë në anën e duhur të historisë. Me Kushtetutën ka qenë Librazhdi në vitin ‘94, me Kushtetutën u bë në vitin ‘98, me Kushtetutën do jetë edhe në 25 prill 2021. Presidenti Meta do ta vizitojë gjithmonë e më shpesh Librazhdin, për ngjashmërinë e madhe, që ka me Çorovodën, të dyja si krahët e pëllumbit buzë lumit”, ka shkruar Tedi Blushi.
Pjesëmarrja e presidentit të vendit në fushatë elektorale ka qenë një pikë debati e shpeshtë edhe nga vetë Meta me kryeministrin Rama. Ky i fundit ka hedhur shpesh akuza se Meta po e shkel hapur Kushtetutën duke organizuar fushatën për LSI. Vetëm pak ditë më parë Edi Rama ka porositur deputetët socialistë që të bëjnë sytë katër, pasi ka informacioneve se edhe presidenti Ilir Meta po luan shumë fort në prapaskenë, duke bërë fushatë në mbështetje të Lëvizjes Socialiste për Integrim.
Në këtë pikë, mësohet se shefi i Partisë Socialiste ka bërë me dije para grupit parlamentar se kreu i shtetit po infiltron njerëz të tij në PS për të krijuar puçe para zgjedhjeve. Po ashtu Rama ka deklaruar se Meta po bashkëpunon me gjyqtarë e prokurorë të shkarkuar nga vetingu, duke iu kërkuar që ta ndihmojnë për rrëzimin e qeverisë.
