Ministria e Mbrojtjes e Mbretërisë së Bashkuar pranoi se deri në 20 ushtarë kanë humbur jetën në një mal të Uellsit, kryesisht gjatë trajnimit për njësinë elitare SAS.
Dy herë në vit, rekrutët e mundshëm udhëtojnë në Beacons Brecon për të kaluar procesin e përzgjedhjes për forcat speciale.
Megjithëse shumë prej tyre nuk hyjnë përfundimisht në njësinë luftarake elitare, disa, për fat të keq, as nuk kthehen nga mali, sepse stërvitja rigoroze, e kombinuar me terrenin e ashpër, ndodh të sjellë dhe pasoja tragjike.
Të dhënat nga viti 1984 tregojnë se gati një ushtar vdiste çdo vit gjatë trajnimit në Uellsin Jugor.
Tani po bëhet thirrje për ngritjen e një monumenti të përhershëm për ata që vdiqën duke u përpjekur të bashkoheshin me elitën më të lartë të ushtarëve të Forcave të Armatosura Britanike. Propozimi u bë nga një ushtar që humbi shokun e tij ndërsa po stërvitej në zonë gjatë përzgjedhjes së SAS.
Ushtari anonim, i cili ishte mik dhe koleg i të ndjerit, kërkoi nga Ministria e Mbrojtjes detaje se sa rekrutë të mundshëm humbën jetën në zonë.
Në një letër me shkrim, ai tha:
“Unë fola me këshilltarët dhe politikanët lokalë në lidhje me memorialin e oficerëve që humbën jetën në Beacons Brecon. Kam humbur një mik dhe koleg të ngushtë atje ndërsa po stërviteshim për forcat speciale disa vjet më parë dhe është një përjetim i pashlyer.”
Të dhënat u lëshuan në përgjigje të një kërkese për të drejtë informacion. Midis të vdekurve më të fundit ishin James Dunsby, Lance Edward Maher, Craig Roberts.
Gjithashtu, Joshua Hoole vdiq gjatë një provë fitnesi në ditën më të nxehtë të vitit 2016, ku temperaturat në zonë arritën në 30 ° C. Pas hetimit të tragjedisë, mjeku ligjor tha se ai ishte seriozisht i shqetësuar për mungesën e aftësisë ushtarake “për të mësuar nga gabimet e mëparshme”.
Roberts dhe Maher vdiqën nga goditja e nxehtësisë në një marshin 27,75 kilometrash, ndërsa Dunsby vdiq nga dëmtimi i organeve gjatë nxehtësisë ekstreme në Pen Y Fan në 2013. Marshimi 27.75 kilometra mbi Pen Y Fan konsiderohet si një nga detyrat më rraskapitëse.
Rekrutët duhet të kalojnë malin shpejt ndërsa mbajnë një ngarkesë 45 kile dhe një pushkë.
Në temën e memorialit, një ish-ushtar i SAS tha për Mirror: “Një monument guri pa emër mund të jetë i mundshëm. Një monument me emra mund të ketë efektin e gabuar”.
Një zëdhënës i Ministrisë së Mbrojtjes së Mbretërisë së Bashkuar tha: “Ngushëllimet tona më të thella për familjet dhe miqtë e atyre që humbën jetën tragjikisht. Shëndeti dhe siguria e stafit tonë është një përparësi dhe ne jemi duke rishikuar vazhdimisht mjediset e trajnimit dhe metodat për të siguruar që ato të jenë sa më i sigurta të jetë e mundur”.
