Gjyqtarët dhe prokurorët e përfshirë në dosjet më të bujshme të drejtësisë për 15 vite do të qëndrojnë jashtë sistemit. Vetingu shpartalloi Gjykatën e Lartë, gjykatë e cila ka mbyllur dosjet më të rëndësishme në vend, që nga 21 Janari, Gërdeci, afera e rrugës Durrës-Kukës, apo ajo e videos Meta-Prifti.
Të gjithë ata që janë përfshirë në këto dosje kanë ngelur ose janë dorëhequr. Nëse marrim si shembull trupën gjyqësore që i dha pafajësinë Metës në videon me Priftin, anëtarë të saj kanë tentuar që të mos lejojnë largimin me 15 vite. Një ndër këta emra është ish-gjyqtarja Arjana Fullani, e cila dha dorëheqjen nga detyra dhe KPK e ndërpreu vetingun duke e larguar për 15 vite nga sistemi.
Ajo iu drejtua Kolegjit të Apelit ku dhe ky i fundit e rrëzoi. Gazeta ka mësuar se trupa është ndarë 3 me 2, ndërsa është zbardhur dhe vendimi me detajet se përse Fullani do të duhet të qëndrojë për 15 vite jashtë sistemit.
“Në analizë të akteve të sipërcituara dhe të parashtrimeve në seancë gjyqësore, trupi gjykues çmon se mospranimi i subjektit të rivlerësimit, pas përfundimit të mandatit si gjyqtare në Gjykatën e Lartë, në bazë të nenit 62, pika 1 e ligjit nr. 96/2016, për t’u caktuar në një pozicion në nivelin e Gjykatës të Apelit, as tani as në të ardhmen, është shprehje e vullnetit të saj për heqjen dorë nga ushtrimi i detyrës si gjyqtare në nivel apeli, si e drejtë e garantuar për shkak të gëzimit të statusit të magjistratit.
Në këtë rast, me të drejtë Komisioni ka vendosur ndërprerjen e procesit të rivlerësimit, duke zbatuar nenin G të Aneksit të Kushtetutës, duke deklaruar humbjen e së drejtës së subjektit për t’u emëruar në funksionet e parashikuara nga kjo dispozitë për një periudhë 15- vjeçare”, thuhet në vendim.
Trupi gjykues vlerëson se refuzimi i vazhdimit të “kontratës” me shtetin për të qenë gjyqtare në nivel Apeli, kontratë e lidhur me hyrjen në fuqi të ligjit nr. 96/2016, sjell si pasojë humbjen e statusit të magjistratit, ndërsa në kuadër të procesit të rivlerësimit ky refuzim parashikohet si heqje dorë nga detyra e gjyqtares. “Vullneti për të mos iu shmangur procesit të rivlerësimit shprehet vetëm nëpërmjet qëndrimit në detyrë dhe përfundimit të procesit të rivlerësimit.
Kur subjekti i rivlerësimit, me vullnetin e vet nuk pranoi të caktohej si gjyqtar në nivel apeli, detyrë që e bënte subjekt të procesit të rivlerësimit ex officio, duhet të kishte marrë parasysh dhe pasojat ligjore të parashikuara në nenin G të Aneksit të Kushtetutës”, thuhet në vendimin e dhënë nga Ina Rama, Rezarta Schuetz dhe Natasha Mulaj. Ndërkohë kundër kolegëve kanë dalë Albana Shtylla dhe Sokol Çomo.
Shkërmoqja e trupës që i dha pafajësi Metës
Trupa gjykuese për rastin e videos Meta-Prifti ishte: Ardian Dvroani, Arjana Fullani, Gani Dizdari, Majlinda Andrea dhe Guxim Zenelaj. Me vendimin e marrë nga KPA merr fund beteja e tyre kundër drejtësisë duke vulosur largimin me 15 vite. Dvorani është i vetmi në sistem, por ai doli me mendim paralel. Sa u takon emrave të tjerë, Fullani dhe Zenelaj dhanë dorëheqjet.
Ky i fundit nuk e vijoi betejën në Apel duke pranuar ndërprerjen e vetingut nga KPK. Ndërkohë Arjana Fullani kërkoi në KPA që të mos përjashtohet me 15 vite, gjë që nuk u pranua. Majlinda Andrea u dënua për korrupsion, ndërsa Gani Dizdari ngeli në veting. Edhe ai u rrëzua nga KPA, e cila la në fuqi shkarkimin. Pra mesa duket, të gjithë ata që votuan pro Metës sot e gjejnë veten 15 vite jashtë sistemit.
