Përgjimet e antimafias italiane kanë trazuar opinionin publik jo vetëm në vendin fqinj, por edhe tek ne, pasi në përgjime përmenden dhe figura politike shqiptare.
Sot në studion e “Open” është diskutuar lidhur me këto përgjime dhe përfshirjen e politikës shqiptare, teksa nuk ka munguar debati mes panelistëve.
Frrok Çupi ka thënë se nuk ka asgjë në këtë histori, dhe se ata që flasin në telefon janë hallka e fundit e mafias që mburren në telefon me emrat e figurave të larta në Shqipëri.
Nga ana tjetër përfaqësuesi ligjor i PD, Çlirim Gjata tha se kjo është një ngjarje e madhe dhe një skandal i thellë, që tregon lidhjen e mafias me qeverinë shqiptare.
Mes Çupit dhe Gjatës ka pasur një përplasje lidhur me komentet e tyre të ndryshme për ngjarjen në fjalë, teksa janë ngritur dhe tonet e debatit.
Çupi: Media dhe politika po e bën pollin budalla. Ai është një zarf bosh, që s’ka asgjë brenda. Nuk ka një çështje. Duhet të kesh një çështje, nuk ka. Duhet të kesh një shifër, shifër nuk ka. Duhet të ketë të akuzuar, nuk ka. I vetmi që përmendet aty, është Ilir Kulla. Por si mund ta akuzosh Ilir Kullën se i paska siguruar një takim atij të mafias me prokurorin italian të antimafias. Nuk ndodh. Bie Italia. Këta janë halabakë që flasin, janë fundi i mafias. Ju nuk dëgjoni halabakë që flasin mburren në telefon me emra të mëdhenj. Hajd se njoh kryeministrin, tjetri të thotë hajde se do të lë takim me presidentin. Këta po e shkatërrojnë opinionin publik. Nëse do kishte një fakt do dilja unë të flisja, por po fyhet inteligjenca e këtij kombi. I thua kombit shqiptar kemi një çështje të madhe, dhe nuk ka, 0.
Vasili: Ndreca, çfarë janë këto përgjime, indicie, prova, apo kemi të bëjmë me fakte konkrete?
Ndreca: Për 1 vit, kanë tentuar të investojnë në Shqipëri, por kanë dështuar se nuk kanë mundur të bëjnë asnjë aktivitet, janë munduar më kot t’i afrohen figurave politike, dhe kanë dështuar me sukses. Prokuroria italiane i shpreh qartë argumentet. Nuk e lexova ambasadorin italian, por jam dakord me të kur thotë se janë gjyqtarët ata që përcaktojnë vendimet finale. Nga pikëpamja profesionale, duke qenë se janë dy vjet hetime, unë gjykoj që ka shumë pak hapësira për të hetuar nga prokuroria shqiptare. E ka hetuar dhe veprimtarinë e tyre në Shqipëri, dhe ka parë që s’ka investime në Shqipëri, përveç një biznesi rrobash. Unë di që SPAK ka bërë deklaratë se po merr informacione. Italia ka marrveshje me ne për ndihmë të ndërsjelltë juridike, dhe nëse do kishte pasur indicie për zyrtarë shqiptarë do i kishte dhënë sinjale prokurorisë apo vetë do hetonte.
Gjata: Ky korrupsion nuk është thjesht skandali i radhës, mbas darkës së famshme. Janë nga 3-4 në javë, por ky është i përmasave të tjera. Këto e kanë bazën tek ato zgjedhjet që i kemi folur. Këtu ka bashkëpunim te mafias me qeverinë. Ky është rast i madh sepse po diskutohet me një organizatë mafioze të madhe si ajo e Ndraghetës. Ata nuk e dinin që po përgjoheshin. Kur përgjohet dikush po flet me sinqeritet, pra çdo gjë është e vërtetë. Në këtë maxhorancë kanë hyrë dhe kanë dalë personazhe që kanë pasur lidhje me krimin.
