Pas ligjit organik mazhoranca ka ndërmarrë një tjetër lëvizje për të kufizuar presidentin. Pasi disa javë më parë plasi skandali për dhënin e nënshtetësive, ku pati akuza ndaj presidentit se ka abuzuar me to duke bërë qoka. Mirëpo qeveria ka vendosur të krijojë një agjenci të posaçme që do të merret me dhënien e shtetësisë së veçantë.
Sipas një vendimi të publikuar në Fletoren Zyrtare kjo agjenci do të kontrollojë dhe monitorojë të gjitha nënshtetësitë e veçanta që do të jepen nga presidenti dhe më pas do të japë verdiktin e saj për miratimin apo jo të një shtetësie. “Me propozimin e ministrit të Brendshëm, Këshilli i Ministrave vendosi: krijimin, organizimin dhe funksionimin e Agjencisë së Hartimit të Programeve të Veçanta të Shtetësisë (në vijim AHPVSH), si person juridik publik, buxhetor, në varësi të ministrit përgjegjës për çështjet e shtetësisë dhe azilit (në vijim ministri), me seli në Tiranë.
AHPVSH-ja ka si mision përgatitjen e programeve të veçanta, përcaktimin e rregullave specifike të kontrollit të veçantë dhe të pastërtisë së figurës në standardet më të larta, si dhe monitorimin e zbatimit të tyre”, thuhet në vendim. Ndër të tjera bëhet me dije se, AHPVSH-ja do mund të shtrijë veprimtarinë e saj në të gjithë territorin e Republikës së Shqipërisë dhe organizohet në nivel qendror.
Ndërsa më tej përcaktohet se, më vënien në zbatim të AHPVSH do të merren në përgjegjësi nga drejtori i Përgjithshëm, i cili organizon e drejton të gjithë veprimtarinë e saj dhe përgjigjet para ministrit. Sipas këtij vendimi, struktura dhe organika e AHPVSH-së miratohet me urdhër të Kryeministrit, sipas përcaktimeve të legjislacionit në fuqi për organizmin dhe funksionimin e administratës shtetërore.
Ja si do funksionojë agjencia
Duke theksuar edhe njëherë faktin se krijimi i kësaj agjencie është shumë i veçantë, vendimi përcakton se edhe drejtuesi i saj duhet të jetë shumë i përgatitur dhe i kualifikuar për atë përgjegjësi që mban posti. Prandaj kërkohet që, Drejtori i Përgjithshëm duhet të ketë të paktën 5 vite eksperiencë pune në organet e administratës shtetërore.
Ky fakt është shumë i rëndësishëm pasi nga drejtuesi varet edhe ecuria e punës së agjencisë, ndërsa më tej zbardhen hapat që do të ndjekë AHPVSH në veprimtarinë e saj. Në vendim thuhet se, do të jetë kjo agjenci institucioni që do të përgatisë kriteret teknike për fitimin e shtetësisë sipas programeve të veçanta të përcaktuara në shkronjën, procedurat e aplikimit, rregullat e kryerjes së verifikimeve dhe kontrolleve të nevojshme dhe ia propozon për miratim autoritetit përgjegjës.
Sakaq shpjegohet se agjencia duhet më parë të përgatisë një program me rregulla dhe kritere të veçanta mbi të cilin do të bazohet për dhënien e shtetësisë apo jo. Kështu agjencia është e detyruar që më parë të shqyrtojë me imtësi arsyet përse aplikantët kërkojnë marrjen e shtetësisë shqiptare dhe vetëm në fund të gjithë analizën ia përcjell autoritetit përgjegjës për miratim ose jo të kërkesës për shtetësi.
“Para se të vendosë për dhënien e shtetësive AHPVSH harton dhe administron programet e veçanta. Në bazë të procedurave ligjore përkatëse, nënshkruan marrëveshje me entitete të specializuara për hartimin, implementimin, administrimin, promovimin ndërkombëtar të programeve, ndërmjetësimin e aplikimeve,verifikimin e pastërtisë së figurave, si dhe çdo shërbim tjetër në funksion të hartimit dhe implementimit të programeve, bazuar në eksperiencat më të mira ndërkombëtare. Gjithashtu do të shqyrtojë aplikimet për përputhshmërinë e kritereve për fitimin e shtetësisë, realizon verifikimet e kontrollet në lidhje me pastërtinë e figurës dhe, në rast të plotësimit të kushteve të përcaktuara në programet e veçanta të miratuara sipas legjislacionit në fuqi, u përcjell autoriteteve kompetente propozimin për vendimmarrje”, sqarohet në vendim.
