Komisioni i Sigurisë Kombëtare ka vendosur të thellojë hetimet sa i takon qokave të bërë nga presidenti Ilir Meta me nënshtetësitë shqiptare.
Pak ditë më parë dolën në dritë skandalet e presidentit Meta, i cili nuk ka ndjekur procedurën dhe ka anashkaluar verifikimet, duke iu dhënë nënshtetësinë shqiptare një sërë personave të panjohur. Sipas mediave, këta individë janë pajisur me pasaportë nga kreu i shtetit edhe pse nuk janë pjesë e listës së personave që hyjnë tek “interesi kombëtar” apo “meritat e veçanta”, siç parashtron ligji për dhënien e shtetësisë.
Komisioni kërkon dokumente nga 5 institucione
Por gazeta ka mësuar se Komisioni i Sigurisë është i vendosur për të fundosur Ilir Metën. Kështu burime të siguruara nga ky komisioni i pohuan gazetës se pas seancës dëgjimore me gazetarin që zbuloi skandalet e Metës me shtetësitë, hetimet ndaj presidentit po thellohen.
Sipas informacioneve, mësohet se Komisioni i Sigurisë është vënë në lëvizje, ndërsa ka dërguar shkresa, duke kërkuar informacione nga plotë pesë institucione. Mësohet se anëtarët e “Sigurisë” kanë kërkuar informacione nga Ministria e Brendshme, Policia e Shtetit, Drejtoria e Përgjithshme e Antiterrorit, Shërbimi Informativ Shtetëror dhe Presidenca, për të pasur një panoramë të qartë mbi procedurat që janë ndjekur nga këto pesë institucione dhe sidomos zoti Meta, ndaj të cilit janë hedhur akuza së fundmi për shtetësitë.
Kështu që i ndodhur përpara kësaj situate të paprecedentë, Komisioni i Sigurisë ka shprehur gatishmërinë për t’i shkuar deri në fund hetimeve për këtë çështje dhe për të mësuar se si qëndron e vërteta me nënshtetësitë. Po ashtu, të njëjtat burime theksuan se Komisioni i Sigurisë do të zhvillojë një mbledhje tjetër për këtë çështje për të diskutuar dhe shoshitur dokumentacionin dhe provat e marra nga 5 institucionet për këtë çështje.
Madje, mësohet se nëse gjatë korrespodencave dhe në dokumentacionin që iu është vënë në dispozicion për këtë skandal do të hasin shkelje dhe mbivendosje, Komisioni i Sigurisë pritet që t’i drejtohet organit të akuzës me padi penale kundër Presidentit të Republikës, Ilir Meta. Megjithatë, mbetet të shihet në ditët në vijim se çfarë do të ndodhë më konkretisht dhe si do të shkojë kjo çështje, e cila ka shkaktuar mjaft debate në media dhe korridoret e politikës.
Presidenca nuk mund të përdoret për qoka
Por në lidhje me skandalet me shtetësitë, ka reaguar pak ditë më parë edhe kryetarja e Komisionit të Sigurisë, Ermonela Felaj, e cila teksa i kërkoi sqarime gazetarit Doçi në seancën dëgjimore se nga i ka gjetur këto të dhëna, i dërgoi një mesazh presidentit Ilir Meta, duke i kujtuar se Presidenca nuk mund të përdoret në mënyrë të papërgjegjshme për qoka personale.
“Nga i keni marrë indiciet dhe i keni gjetur këto fakte? Ndërkohë ju lutem na jepni një kopje të dokumentacionit. Ne do të bëjmë verifikimet tona. Por Presidenca nuk mund të përdoret për qoka personale”, deklaroi Felaj.
Ndërsa deputeti i opozitës së re, Myslim Murrizi gjatë seancës dëgjimore në Komisionin e Sigurisë me gazetarin Adriatik Doçi ka kërkuar nisjen e një hetimi të thelluar për dhënien e nënshtetësive nga presidenti Ilir Meta. Gjatë fjalës së tij Murrizi, kërkoi që të thirreshin përfaqësues të SHISH dhe të Ministrisë së Brendshme për të dhënë sqarime nëse janë verifikuar apo jo për kushtet e sigurisë 419 persona të cilëve Meta u ka dhënë nënshtetësi shqiptare me vullnetin e tij dhe në emër të interesit kombëtar pa plotësuar kushtet.
Murrizi vuri theksin edhe tek diferenca e madhe mes numrit të nënshtetësive të dhëna nga presidenti Meta dhe presidentët e kaluar.
