Kryedemokrati Lulzim Basha në një konferencë me gazetarët deklaroi sot se vënia në zbatim e planit me 5 pikta të rimëkëmbjes që propozon PD është domosdoshmëri sot më shumë se kurrë.
Ai i etiketoi si monstra qeveritarët, ndërsa qytetarëve iu këshilloi të mbjanë maska, të ruajnë higjienën, pasi askush nuk po mendon për ta.
Kryedemokrati Lulzim Basha në një konferencë me gazetarët deklaroi sot se vënia në zbatim e planit me 5 pikta të rimëkëmbjes që propozon PD është domosdoshmëri sot më shumë se kurrë.
“Plani me 5 pika ka nevojë sot të zbatohet më shumë se kurrë. Duke nisur me shëndetësinë: Pse nuk bëhen teste masive për të pasur skuadra të mjaftueshme që të bëjnë izolime të rasteve pozitive dhe kontakteve të ngushta dhe pastaj ju thonë: Ju thamë vini maska?
I marrin shqiptarët për budallenj, kjo është dështim i një qeverinë dhe një kryeministri që ka për qëllim vetëm t’i vjedhë. Këto monstra e kanë lënë shoqërinë në mëshirë të fatit, ju si prindër, fëmijët tuaj aq sa mund të bëni duhet patjetër ta bëni që nga maskat, distanca apo higjiena.
Detyra e tyre nuk është t’ju vënë gjobë, por të investojnë tek ata që s’kanë para, të blejnë se s’kanë as bukë, të investojnë te testimet, të mbrojnë mjekë e infermierë që po sëmuren”,- tha ai, ndërsa renditi me detaje edhe pikat e planit të PD.
Plani i Rimëkëmbjes: 5 hapa kundër krizës
1. Mbështetje dhe përgatitje e sistemit shëndetësor: Përgatitja për një shpërthim tjetër të infeksionit të COVID-19, duke:
a) Rritur numrin e testimeve për COVID në 2500 testime në ditë.
b) Rimbursim i plotë për marrjen e mjekimit ambulator kundër COVID.
c) Sigurimin e paisjeve mbrojtëse për të gjithë personelin shëndetësor dhe rritjen e kapaciteteve spitalore.
d) Bonus 1000 Euro për çdo mjek dhe 500 euro për çdo infermier për 6 muajt e ardhshëm.
2. Fëmijët tanë të arsimohen të sigurtë: Të garantojmë që fëmijët dhe mësuesit në shkollë të jenë të sigurtë, duke:
a) Përmirësuar kushtet sanitare në shkolla duke përfshirë furnizimin me ujë, paisjen me maska mbrojtëse dhe dezinfektimin e rregullt të ambienteve mësimore.
b) Kryer testimin periodik për mësuesit dhe stafin ndihmës.
c) Investuar në teknologji për rastet kur mund të aplikohet mësimi në distancë, përfshirë ndihmën për familjet me të ardhura të ulta për të blerë tableta për fëmijët e tyre, në mënyrë që edhe ata të përfitojnë nga mësimi në distancë.
3. Asnjë shqiptar të mos lihet pas dore:
a) Të mbështesim ata që kanë humbur vendin e punës. Çdo individ që ka humbur vendin e punës nga pandemia gjatë këtij viti, të përfitojë një çek mujor prej 16 mijë lekë të reja në muaj, përvec pagesës ligjore për papunësinë, për një periudhë prej 6 muajsh.
b) Krijimi i një Fondi të Punësimit për të mbështetur bizneset për të rimarrë në punë të larguarit gjatë pandemisë, duke i alokuar cdo punëdhënësi që rimerr në punë një individ që ka humbur vendin e punës prej pandemisë, një shumë mujore prej 20 mijë lekë të reja në muaj për një periudhe prej 6 muaj.
c) Dyfishimi i ndihmës ekonomike për çdo familje që trajtohet me ndihmë ekonomike.
d) Çdo pensionist të përfitojë një çek mujor prej 2 mijë lekë të reja në muaj për përballimin e kostove shtesë të pandemisë, për 6 muaj.
4. Ndihmë për biznesin e vogël: Mbështetje e drejtpërdrejtë për të gjitha bizneset e vogla të prekura nga pandemia. Çek prej 1000 euro për çdo biznes të vogël aktiv.
5. Mbështetje për biznesin prodhues dhe punëdhënësit e mëdhenj:
a) Për 6 muajt e ardhshëm, subvencionim i 50% të qirasë për ambjentet e punës ose heqje e taksës së pronës për bizneset pronare të ambjenteve të punës.
b) Shtrirja në kohë dhe rikonceptimi i kritereve të përfitimit nga të dy skemat e garancisë sovrane, për ta bërë më të aksesueshme dhe të përballueshme kredimarrjen nga biznesi. Përcaktimi i një tavani prej 2% të normës së interesit për biznesin, duke subvencionuar çdo përqindje mbi këtë vlerë në kredimarrjen për investime dhe shpenzime operative.
