Ilir Meta duket se ndodhet në një situatë të vështirë. Djegia e mandateve, braktisja e zgjedhjeve dhe zvarritja e reformës zgjedhore duket se kanë krijuar shumë kosto për LSI, e cila rrezikon shumë në zgjedhjet e 25 prillit.
Por si asnjëherë më parë, në zgjedhjet e vitit që vjen nuk do kemi vetëm garë pozitë-opozitë, por në mes do të jetë dhe Presidenti i Republikës. Gazeta ka mësuar se Meta po punon fort në prapaskenë për të mos lejuar një shkërmoqje të LSI. Në 2017 Rama dhe Basha i dhanë një goditje të fortë, e cila shërbeu për të mos lejuar të rritej më tej.
\
Zgjedhjet e 25 qershorit rrezikojnë t’i heqin asaj shumë mandate dhe Meta është hedhur në veprim. Skenari që po ndjek Meta është i tillë: Po tenton kaos, klimë tensioni dhe pasiguri para zgjedhjeve. Një burim në LSI i tha gazetës se tashmë frenat e partisë i ka marrë Meta dhe të gjithë veprojnë sipas mesazheve që u dërgon ai në celular. Pavarësisht se në media Basha e Kryemadhi flasin për një front të bashkuar kundër PS, mësohet se Meta nuk ja ka besën Bashës, po ashtu është i pakënaqur me stilin e tij.
Edhe në intervistën që dha të martën, Meta u munda t’i jepte direktiva se duhet të jetë më aktiv këto kohë dhe të mos flejë gjumë. Djegia e mandateve, braktisja e zgjedhjeve dhe heqja e koalicioneve duket sikur janë në një linjë dhe presidenti i druhet një tjetër puçi nga ana e PD.
Për këtë arsye ka vendosur që të bëhet protagonist me qëllim që situata të jetë sa më e nxehtë dhe elektorati të votojë për LSI dhe jo për PD dhe PS. Nga LSI mësohet se skenari i Metës është që të kemi një klime konfliktuale, e cila sipas skenarit të tij, dëmton qeverinë. Pra e gjithë loja është që qytetarëve dhe ndërkombëtarëve t’u jepet një mesazh se me Ramën nuk ka siguri.
Rikthimi i elektoratit
Nga ana tjetër presidenti ka nisur takime të fshehta në bazë duke mobilizuar elektoratin. LSI i ka ikur gati 80 për qind e elektoratit dhe duke qenë se Kryemadhi nuk po ja del ta rikthejë, dalja në skenë e Metës ka dhe këtë qëllim.
Ata që Meta futi në parti dhe i punësoi në administratë sot kanë kaluar me PS dhe po mundohet që përmes protagonizmit t’i bindë ata se LSI do të jetë në pushtet dhe po ashtu është ai që e drejton partinë. Nga ana tjetër gazeta ka mësuar se Meta po ushtron presion të madh në prapaskenë ndaj Bashës.
E para kërkohet që LSI të jetë pjesë e listave të PD. Elementi i dytë është se Meta po mendon që të jetë pjesë e qeverisë vitin që vjen dhe kërkon postin o të ministrit të Brendshëm o të kryeministrit.
Nga ana tjetër Meta po shfrytëzon dhënien e dekoratave për të siguruar vota. Çdo ditë presidenti po shpërndan dekorata me shpresën se familjarët e të dekoruarve do të votojnë LSI.
Frika nga SHBA
Por gazeta ka mësuar se presidenti është alarmuar nga amerikanët. Zhvillimet e ditëve të fundit kanë rënë si bombë në Presidencë. Firmosja e paktit ekonomik me SHBA sidomos për Skavicën ka alarmuar kreun e shtetit, pasi SHBA e firmosi para zgjedhjeve dhe zv/sekretari i Energjisë e cilësoi Ramën si lider.
Por deklarata që ka alarmuar dhe më tepër kreun e shtetit është ajo e ambasadës së SHBA, e cila u shpreh se pakti i 5 qershorit nuk u shkel. Mësohet se në rrethin e tij Meta e ka kritikuar fort këtë deklaratë. Ajo që e dëshmon më së miri këtë është dhe një deklaratë e tij dje për situatën në Kirgistan ku ambasador është Donald Lu.
“Pas protestave popullore në Kirgistan, Komisioni Shtetëror i Zgjedhjeve mori vendimin për anulimin e zgjedhjeve parlamentare të zhvilluara së fundi në Kirgistan dhe vendosi përsëritjen e tyre në një kohë të afërt. Me këtë rast, dëshiroj të përshëndes popullin kirgiz për guximin e treguar në denoncimin e parregullsive masive, veçanërisht atë të blerjes së votave nga forca pranë pushtetit, si dhe në përballjen me cenimin e rëndë që ju bënë lirive e të drejtave themelore të tij, duke i mohuar të drejtën për zgjedhje të lira e demokratike.
Qytetarët e Kirgistanit, si qytetarët e të gjitha vendeve të hapësirës së OSBE-së, meritojnë zgjedhje të lira e demokratike”, tha ai. /Kliti Topalli
