Mediat greke njoftojnë se shteti fqinj do të goditet nga një ciklon të shtunën. Meteorologjia Adiola Bani tha se kjo nuk e prek Shqipërinë por në fundjavë do të ketë rrebeshe shiu e stuhi.
Hyrja zyrtarisht në stinën e vjeshtës na ka sjellë shira dhe ulje të temperaturave. Por meteorologët paralajmërojnë se i gjithë vendi do të përfshihet nga rrebeshet e shiut dhe shtrëngata.
“Dita e sotme do të paraqitet me alternime kthjellimesh dhe vranësirash që do na sjellin reshje të pakta. Edhe e premtja do na sjellë kushte të njëjta atmosferike, deri në orët e pasdites ku pritet të kemi shtim të vranësirash që do na sjellin reshje gjatë mbrëmjes dhe natës.
Ky sistem me vranësira do na sjelle rrebeshe shiu. Here pas here në formën e shtrëngatave. Është një situatë që nuk do zgjasë shumë, pasi mesdita e së shtunës dhe e diela do na sjelle përmirësim të motit. Kjo do na sjellë dhe ulje temperaturash. Vlerat ditor do luhaten nga 6-7 gradë në mëngjes në zonat malore, kurse maksimumi në 24-26 gradë Celsius. Këto rrebeshet e shiut janë mëse normale në stinën e vjeshtës.
Vendi jonë ndikohet vetëm me vranësira dhe rrebeshe shiu, por që nuk do të zgjasin shumë në kohë. E diela në orët e mbrëmjes dhe e hëna do sjellin sërish rrebeshe shiu dhe vranësira të dendura. Shpresojmë që nuk do të na sjellin problematika.
Për sa i përket Greqisë e shtuna të sjellë rrebeshe shiu me intensitet goxha të lartë, pasi fundjavën që kaloi pati një stuhi tropikale. Duke qenë se kemi temperature të larta këto ditë sigurisht nuk përjashtohen dhe rrebeshet me breshër”, tha meteorologjia, Adiola Bani për Report Tv.
