Në përpjekje për të bërë paralele me aksionin e dikurshëm të PS; “hap kutitë ose largohu”, Presidenti e ka nisur ditën sot me parrullën e aktualizuar: Hapni listat, ose largohuni!
Duke i paraprirë postimit në facebook-un e tij personale me fjalët “mos kini frikë nga hapja e listave”, Ilir Meta nuk po bën gjë tjetër, veçse po tenton të fshehi frikërat e tij që lidhen me zgjedhjet e 2021.
Përtej batutës së Kryeministrit Edi Rama që e vizaton Kryetarin e Shtetit si njeri që “ka një raport personal me rrotullimin e hënës dhe se varet se ku është hëna në momentin kur ai flet”, një gjë është e vërtetë: Diskursi publik i Ilir Metës nuk njeh më limite.
Madje sa më shumë rri në zyrën e Nr. 1 të shtetit, aq më shumë e shfrenon fantazinë përtej çdo kufiri dhe kodi politik, në lëmin e komunikimit publik.
Të vjen të ulërasësh: Hapu dhe’,- kur mëson që ka shkruar se qytetarët prej 12 vjetësh kërkojnë deputetë e jo kukulla kryetarësh. A thua se nuk është ai vetë lideri politik, që e themeloi këtë standard kur largoi gjithë themeluesit e LSI për ti zëvendësuar me gocat dhe ndonjë çun të “shkollës së Jalës” të cilët më shpejt u ulën në tavolinat e Parlamentit, sesa në ato të universiteteve!
Përtej merakut të madh që e paska “lënë pa gjumë” Presidentin e Republikës sonë, fshihen makthe dhe frikëra të tjera. E fundit gjë që mund të besojnë shqiptarët, është se Ilir Meta e ka vërtetë hallin, tek hapja ose jo e listës së kandidatëve për deputetë. Frika e Ilir Metës buron nga pika tjetër e ndryshimeve kushtetuese të 30 korrikut. Tek ajo që ka të bëjë me koalicionet parazgjedhore, me një listë unike, të të gjitha partive pjesëmarrëse në to.
Sanksionimi i këtij rregulli që standardizon koalicionet, do ta detyrojë PD të dali më vete.
Në kushtet kur sondazhet tregojnë se LSI ka një rënie të jashtëzakonshme të mbështetjes popullore, partisë së Ilir Metës pas zgjedhjeve, do i duhet të qëndrojë edhe 4 vjet të tjera në opozitë. Për një parti klienteliste si ajo, që nuk ka qëndruar kurrë kaq gjatë larg pushtetit, kjo do të thotë praktikisht vdekje politike.
Ilir Meta nuk do të jetë më faktori i tretë, përcaktues i Iojës politike, në skenën e madhe të Tiranës. Pas një viti nga përfundimi i zgjedhjeve, Ilir Meta më 2022, nuk do jetë më President. Për herë të parë pas 30 vjetësh, nuk do të jetë më, as deputet. Në periudhën mes viteve 2022- 2025,- që pas vitit 1992,- ai do të jetë një qytetar i thjeshtë.
Duke e ditur këtë, të gjithë po i largohen me shpejtësi LSI-së. Kjo e shtyn atë që ti gënjejë sot kriminelët, duke u thënë se do jetë ministër i Brendshëm, më 26 prill 2021.
Jashtë Presidencës, jashtë Parlamentit, larg pushtetit legjislativ, në opozitë, jashtë pushtetit qëndror dhe atij lokal, Ilir Meta do të njohi për herë të parë, zhveshjen totale nga të gjitha imunitetet dhe benefitet e politikanit të lartë e të rëndësishëm.
Deri atëherë të gjitha institucionet e drejtësisë së re jo vetëm do të jenë ngritur, do të kenë nisur që të funksionojnë, por edhe do të jenë të konsoliduara. Të gatshme për të pastruar njëherë e përgjithmonë Shqipërinë, nga ai që avokat Ngjela e quan “korrupsioni i lartë qeveriatar”, me ndihmën e SPAK dhe BKH.
Ndaj mos ia vini ri se çfarë thotë e bën këto kohë Ilir Meta. Duhet më shumë mirëkuptim për të. Tani besoj se edhe të gjithë ju e keni më të qartë, se përse ndihet kaq i frikësuar, nga zgjedhjet e 2021. /Alpenews.al
