Vëllai i kryeministrit Edi Rama, Olsi, që prej më shumë se dy vitesh është drejtor sportiv i Partizanit, ka dhënë një intervistë për Ilva Taren, ku është folur kryesisht për sportin.
Por në fund, ai është pyetur edhe për akuzat në drejtim të tij nga ana e opozitës dhe pse ka heshtur, duke mos iu përgjigjur.
“Unë mendoj se sulmohem thjesht për faktin e lidhjes sime familjare.
Mendoj se çdo gjë që përdoret, përdoret për të dëmtuar imazhin e tij.
Pse nuk përgjigjem? Sepse nuk dua të bëhem pis në llumin që të tjerët ngrenë.
Unë e di se çfarë bëj, e di që çdo gjë që bëj është shuam e drejtë, e ligjshme dhe e rregullt.
Nuk bëj asgjë nga ato që më akuzojnë. Kështu që për këtë pjesë jam i qetë.
Nëse do të më akuzojnë për një gjë tjetër që s’ka lidhje me këtë, që do të më prekë, ndoshta edhe do të përgjigjem.
Por deri tani më kanë lënë thjesht indiferent.
E di që janë pjesë e pisët të luftës politike që bëhet në Shqipëri.
E di që nuk nderon ata që e bëjnë në radhë të parë dhe akuzat janë të vazhdueshme deri në pikën që unë nuk shoh më as lajme, nuk lexoj më as gazeta, përveç atyre sportive, por edhe aty prapë janë mangësitë e rastit.
Më ka bërë përshtypje një shprehje e Denzel Washington që thotë: Kush nuk lexon shtypin nuk është i informuar, kush lexon shtypin është i keqinformuar.
Njerëzit që shpërndajnë informacion duhet të kenë pak më shumë kujdes për atë që shpërndajnë, për atë që thonë dhe nëse të tjerët e thonë në mënyrë të papërgjegjshme duhet pasur kujdes me interpretimin të paktën”, tha ai. /TemA
