Ai kërkon që askush mos t’ia kthejë fjalën. Ai kërkon që kafja t’i shkojë në kohë. Ai kërkon ushqim të mirë dhe ka teka kur nuk i pëlqen. Ai kërkon që t’i shërbejmë dhe t’i qëndrojmë gati tu.
Jo vetëm kaq, por ai ushtron dhunë fizike. Një vajzë e mitur kallëzoi në policinë e Kamzës të atin, i moshës 42 vjeç, i cili nga ana e tij nuk bën asgjë dhe nuk sjell asnjë të ardhur për të rritur fëmijët e tij. Sipas burimeve të gazetës Si burri me zakone prapanike, por gjithashtu edhe me nerva të pakontrolluara, u nxeh që fëmija i ktheu fjalën. Dhe për këtë e goditi me kurrizin e pëllëmbës në fytyrë.
K. Q. e fshiu gjakun që i doli pasi iu ça goja ngaqë ora e të atit iu përplas dhunshëm në fytyrë. “Vëllai më tha të ka dalë gjak, fshije në banjë motër”, citohet në denoncimin e të miturës para policisë. Fëmija tregon se babai i saj bëhej i dhunshëm çdo herë që kthente një gotë alkool, por edhe kur është esëll ai ngre zërin, duke theksuar se burri në shtëpi është ai.
U largova nga frika, shkova tek puna e mamit dhe pastaj erdha në polici tregon fëmija në prani të një psikologu.
Si ndodhi ngjarja
Burri S.Q. rezulton sipas burimeve të jetë shpallur fajtor edhe më herët për akuzën e dhunës në familje. Pas rrahjes së bashkëshortes ai ka filluar të qëllojë edhe fëmijët e mitur.
“Babi erdhi në shtëpi së bashku me një shok. Kërkoi kafe dhe sa e përgatita ua dhashë pa bërë zë. Kur shoku i tij u largua, babi më gjeti në kuzhinë dhe gjithë nerva më pyeti, – pse ma ndërpreve fjalën kur po flisja”, kujton e mitura e cila sqaron agjentin që ka mbajtur shënim ngjarjen se ajo nuk kishte guxuar asnjëherë që të fliste pa marrë leje nga i ati.
“Por ai më qëlloi me pjesën e pasme të pëllëmbës dhe ora e tij më çau buzën. Vëllai u afrua dhe avash më foli: motra të doli gjak ec e laje në banjë.
Në të njëjtën ditë, teksa fëmija po gatuante drekën për anëtarët e tjerë pasi e ëma ishte në punë, babai i papunë ka filluar nga nazet. S.Q. ka ushtruar sërish dhunë.
“Gatova makarona, por babai ishte i irrituar. Kërkoi të gatuaja ushqim tjetër. E derdhi pjatën dhe u mat të më qëllonte me pjatë. Por ndaloi. Pastaj u çua dhe më qëlloi me grusht pas koke”, shton fëmija që sipas burimeve të Gazetës “Si” i ka pyetur agjentët në prani të psikologëve: “Përse babi na rreh, ne të gjithë rrimë urtë para tij?”
