Arkeologët u emocionuan kur zbuluan rrënojën e një anijeje 90-vjeçare të njohur si “e mallkuar”, thujase në gjendje të paprekur në ujërat e Kanadasë.
Mjeti i pasagjerëve Manasoo i ndërtuar në vitin 1888 në Glasgow të Skocisë, nisi po atë vit udhëtimet drejt Toronto në Kanada.
Por më 15 shtator 1928, anija u mbyt pranë ishullit Griffith pas një stuhie të rëndë dhe 16 vetë humbën jetën së bashku me 116 krerë bagëti.
Disa modifikime të shtuara për akomodimin e pasagjerëve ndikuan në prishjen e balancës së saj. Pesë të mbijetuarit kishin qëndruar për 60 orë në barkat e shpëtimit para se të shpëtoheshin nga një anije kalimtare.
Fillimisht anija ishte quajtur Macassa Hamilton Steamship, por mjeti skocez më pas u riemërua Manasoo, për të reflektuar portin ku ndaloi fillimisht Manitoulin dhe “Soo,” siç njihet ndryshe porti Sault Marie, në Ontario.
Detarët thonë se ndryshimi i emrit të një anijeje sjell fat të keq, prandaj anija nisi të quhej shpejt “e mallkuar” pas raportimeve se ishte mbytur.
Në qershor 2018, zhytësit Ken Merryman, Jerry Eliason, Cris Kohl e Jared Daniel, zbuluan rrënojën e Manasoo në 70 metra thellësi.
Agjencia e arkeologjisë në Ontario tha: “Kishim parë rrënoja të ruajtura mirë dhe më parë, por kjo ishte e mrekullueshme. Uji i pastër bashkë me midhjet me motive zebrash, na jepnin shikueshmëri deri në 40-50 metra. Për arsye se pjesa e prapme fundoset e para dhe zhytet në rërë, pjesa e përparme ngrihet lart dhe krijon tipare të mrekullueshme”.
Në anije u gjet gjithashtu rrënja e një automjeti Chevrolet AA Capital të vitit 1927 i cili i përkiste bankierit të mbijetuar Don Wallace.
Pasi morën lejen arkeologjike në Ontario zhytësit zbuluan me kujdes kabinat, dhomën e pilotimit, stallat e lopëve, ato të ngarkesës dhe restorantin.
Natën e fatkeqësisë era u forcua dhe Manasoo po goditej nga valë të mëdha.
Dëshmitarët thonë se shpejt u bë e qartë se anija po fundosej se ekuipazhi nisi të hidhej në det, por shumë nuk arritën të shpëtonin. Ata thonë se kur u fundos maja e anijes u ngrit 10 metra në ajër dhe u zhyt në thellësi.
